街頭測試3G機
羅新基最近喺銅鑼灣行行吓街,見到呢位仁兄拎住部影相手機影相,初頭都唔為意,是關近排影相手機真係大熱,但望真啲,佢手上嗰部並非一般內置鏡頭嘅影相手機,而係NEC部3G機,好似話可以做埋視像會議同視像錄影。家陣喺街頭做測試,唔通部機同各大台已經準備好隨時出擊?以前覺得測試會係甚麼高度秘密,估唔到原來係非常之開放,見到呢位仁兄喺人來人往嘅銅鑼灣街頭上揸住兩部機大搖大擺咗成半個鐘,閣下見過都唔出奇。
韓國冷門BLU機面開天窗
近日喺先達發現咗部外形都幾另類嘅手機,少有地將好多掣搬晒上機面,好似4方操控鍵同開關掣,睇落有啲似MP3,呢部Z8係來自韓國一個較冷門嘅品牌BLU,見到機面有個芒,重以為係雙屏幕機,原來係裝「假狗」,只不過喺機面殼開咗個透明天窗,而功能就有256色彩芒、和弦鈴聲、EMS同GPRS,叫做有齊晒時下手機至Hit嘅功能,機價約二千五,怕且真係貪佢個樣夠特別先至買得落手。
S57有得Set腳架?
重以為西門子部S57唔單止玩閃燈兼可以Set埋腳架咁巴閉,原來只不過係舖頭用部Dummy機夾硬鑽個窿鑲架,家陣賣機擺Display都要玩突出,成個場咁多舖,唔係又點吸引到你注意?不過諗落幫啲影相手機做番個腳架未為不可,皆因有啲機有得Set時間掣玩自拍,有個架就方便好多。
先達買機兼贏機
莫非真係市道咁差,連先達都要搞抽獎搞旺啲個場?由家陣去到2月16日喺個場度購物滿$200就有一張擦擦卡,$400就有兩張,餘此類推,最多有5張,除咗有所謂嘅精美禮品送之外,至吸引都係可以參加抽獎,頭獎係數碼攝錄機,而二獎就有部Nokia6610,買部機閒閒地一、二千,攞多幾張擦擦卡碰吓運氣都好。