英冠球隊阿士東維拉禮拜六喺主場鬥米禾爾，維拉領隊布魯士喺禮拜五嘅賽前記者會就帶咗位新嘅副領隊出席，佢就係得5歲嘅維拉球迷Carter Carrington。

布魯士喺記者會上向傳媒介紹呢位「新助手」之後，出席嘅傳媒都非常配合，向Carter問問題，仲叫佢預測賽果。Carter仔其實係一位無咗左腳嘅小朋友，佢因為出世嘅時候有一種病，令佢嘅左腳少咗一條骨，亦都無咗部分韌帶同一隻腳趾，同時左、右腳嘅長度會唔同，所以Carter仔喺11個月大嘅時候就接受咗截肢手術。由於佢係超級維拉球迷，所以依家裝喺左腳上面嘅義肢都係維拉特別版。

英國傳媒報道，維拉一隊嘅球員係因為聽到Carter仔贏咗當地一項跆拳道比賽而開始談論呢位小朋友，更加難得嘅係，Carter仔係呢項比賽唯一嘅殘障參賽者。維拉之後聯絡Carter嘅爸爸，幫佢安排咗呢次活動。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM