董敏莉(Monie) 囡囡莊子子喺今日Boxing Day滿月，作為新手媽咪嘅Monie，一早就幫囡囡準備咗套聖誕裝，不過小朋友真係瞓得，母女影合照時，子子都係繼續大覺瞓。而第一次感受三人行嘅聖誕節，Monie話過去一個月專心湊女，好彩子子忍耐力夠高：「佢好乖，o依家個人長高咗好多，我發現佢忍耐力都好勁，朋友嘅BB有時去咗小便都會喊住要人換片，不過子子就會唔出聲，到我哋發覺時已經差唔多漏出嚟！今年聖誕節，爸爸唔畀我哋出去玩，所以兩母女留喺屋企扮靚靚。」

Monie幫囡囡着聖誕衫時，子子郁身郁勢，仲識用手撐起自己，佢話：「可能同我哋玩得多有關，我哋成日同佢玩Tummy Time，佢手臂練到好有力，有人話佢可能好快識轉身。」

做咗媽咪一個月嘅Monie，覺得心理上已經好習慣，不過身體就搞到五勞七傷，佢話：「我抱得太多，搞到o依家有媽咪手，有時大動作啲都好痛，惟有放慢腳步，有時會叫老公去開奶同抱阿女，我同子子成個女皇咁享受聖誕節加滿月。」問到送咩禮物畀囡囡？佢笑話：「我已經送咗個包包面畀佢，似足我咁可愛，搞到爸爸都忍唔住成日要錫錫。」

精選娛聞，喺晒《娛果》
http://fb.com/appledailyent