當年今日
關於我們

【韓流】婚禮保安森嚴被指耍大牌?金素妍斥節目誤報

蘋果日報 2017/06/14 14:00

金素妍李尚禹

韓劇《家和萬事成》36歲女星金素妍與同劇37歲男星李尚禹上周五(9號)拉埋天窗,不過婚禮以非公開形式進行,只邀請家人同朋友參加。而噚日播出嘅綜藝節目《演藝深夜》報道咗當日婚禮嘅情況,不過就因為播出咗非事實嘅內容導致一對新人被鬧耍大牌,就連金素妍、李尚禹方面就發聲明澄清。
由於婚禮係非公開形式,所以《演藝深夜》都只可以喺門外拍攝,《演藝深夜》報道指:「當日婚禮嘅必需品係請柬,所以出席婚禮嘅賓客都要喺門外出示請柬先可以入場。」意指保安相當嚴格,如李尚允、宋昌義、李珉宇等為人熟悉嘅演員亦不例外,一樣要出示請柬先可以入場。當中女搞笑藝人李恩亨因為冇請柬而未能進入婚禮現場,《演藝深夜》立即語帶諷刺表示:「因為冇帶請柬,感到好尷尬,入場失敗,只可以返轉頭。」節目播出後,金素妍及李尚禹被網民鬧耍大牌。
及後金素妍方面立即澄清,表示《演藝深夜》係誤報:「同金素妍本人確認後,一對新人唔認識李恩亨,所以並冇邀請對方出席婚禮。不過就算唔係熟人,就算冇請柬,保安都會非常親切接待,亦會畀人入場。至少喺報道前要確認一下事實,但《演藝深夜》卻冇咁做,啱啱新婚要充分享受幸福嘅新婚夫婦,發生咁嘅事令人覺得好遺憾。」而李恩亨方面亦透過Instagram表示自己當時喺婚禮現場附近上完普拉提(Pilates)課程,順道去接身為賓客嘅孟勝智,所以先會被《演藝深夜》拍到當時嘅場面,坦言事實與報道不符。
對此,《演藝深夜》方面發聲明向受影響人士道歉,亦指於節目重播時將會刪除該段婚禮嘅報道。
empty
《演藝深夜》報道指婚禮當日保安森嚴,一眾賓客要出示請柬先可以入場
empty
女搞笑藝人李恩亨因為冇請柬而未能進入婚禮現場
empty
不過李恩亨直指《演藝深夜》誤報,自己並唔係受邀賓客,由一開始就冇收到請柬
empty
金素妍、李尚禹方面亦指報道與事實不符,及後《演藝深夜》方面發聲明道歉