要搵爆升股,首要條件係價位細,有概念都唔夠,最好都仲係公司基本因素要有番咁上下,防守能力就更高。市場上反應遲鈍嘅醜女股有三林環球(3938),剛公佈半年業績轉虧為盈,賺1589萬美元。美元彈升幫咗佢滙兌收入,毛利率亦由8.6%升至12.1%,因為賣多咗毛利高嘅木地板。賣地板係早前全購內地ElegantLiving,帶動地板業務盈利大增至660萬美元,佔整體業務兩成,毛利率高達25%。
公司未來增長亮點,係出口新西蘭同馬來西亞嘅原木往中國,期內輸往中國嘅總額由21%急增至近三成,反映需求增加之餘,開始多客戶加定單代表滿意其產品質素。只可惜賣木始終唔係賺大錢嘅生意,因為毛利率只得7%。
要令呢隻股重現大牛市07年近3.40元嘅光輝,未來要睇中國需求,同佢主要銷往日本同美國起屋用嘅膠合板(Plywood)業務。去年日本建屋量跌至80萬間歷史低位,係45年來最差,有機會大翻身。三林嘅生意通常滯後樓市9個月,係經濟復蘇嘅最後梯隊,當美、日建屋數據好轉,就係三林爆升之時。
胡孟青