婦女黨團召集人係學者黃碧雲,黨內所有女議員、女社區主任都要參加,其他女黨員亦無任歡迎,首次舉行嘅婦女黨員大會有個特別嘉賓,係著名導演許鞍華。據講今次係卿姐提出請許鞍華到場,因為佢早前睇完《得閒炒飯》,覺得套戲好好睇,尤其係探討現代女性自主方面十分有啟發性,於是接觸許鞍華請佢做演講嘉賓。
許鞍華平日罕有談政治,對於卿姐邀請,據聞十分有興趣,仲要求民主黨提供資料畀佢做定功課,八方唔知許鞍華對民主黨支持政改有甚麼意見,會唔會問卿姐嘅心路歷程呢?卿姐好投入黨務,年底民主黨領導層改選,好大機會增加多一個副主席,卿姐噚日表明會推薦資深區議員陳樹英(即係李永達太太)做副主席,仲大讚陳樹英對黨「好大貢獻」,指佢唔係一棵樹,係「一碌杉」撐住民主黨。
卿姐話陳樹英已接受提名,張文光亦表態支持陳樹英上位,而未來一年,民主黨立法會議員要每人提出一項有關女性平權嘅動議辯論或質詢,以示重視女性權益。如此重視女性,八方思疑同想爭取女性選票,補充流失嘅80後選民有關,至於會唔會顧此失彼,令民主黨立場更加保守,值得觀察。