小雪（蔡雪敏）同韓籍老公Robin Cheung喺韓國補辦婚禮，之後小雪會同老公多留幾日先返悉尼，喺韓國過年。

原來小雪喺婚前回想起當年聽命理師傅講嘅一番說話，日前喺facebook自爆喺27歲那年有命理師說自己39歲先真正結婚，小雪話西曆計目前38歲，但農曆年計o依家就係39歲。佢笑言：「覺得好神奇，記得當年啱啱同第二任丈夫拍拖，嗰時仲諗唔通要等12年先結婚？到離咗婚自己諗番呢件事，就諗會係邊個呢？」

小雪又話雖然自己2015年註冊，嗰時都只係簽紙，方便老公喺澳州做嘢，今次行禮、宣誓，對自己嚟講先係真正結婚，不過小雪又話自己唔係迷信嘅人，「最緊要兩個人點維繫婚姻，一齊相處係好多學問，加上我同老公唔同國籍，自己又有一對小朋友，比起正常夫婦係會難啲，但我哋4個人都會努力學習同付出。」

小雪雖然經歷過咁多唔如意嘅嘢，但佢仍然相信命運係掌握喺自己手，想要乜嘢係要付出，唔好埋怨，同時都信緣份，但將來嘢冇人知，至少目前開心就足夠。

前年註冊話唔會生小朋友，未知舉行完婚禮後，有冇改變主意？小雪直言：「老公都當咗我一對小朋友係自己，都想專心工作，將來有多啲二人世界，當然如果上天要俾我哋，我都會接受，老公屋企人話無論我哋生定唔生都支持同接受。」

【minigame】2017瘋暈人物 返工打機唔使擇日
http://bit.ly/2CeWQkP

更多娛聞，喺晒《娛果》
http://fb.com/appledailyent