臨開季前提過，應有三個馬房季初極之恨贏，包括首季開贏要省靚招牌的丁冠豪，結果兩日累積了三Win；亦有面對爆倉行將要數馬走的沈集成，雖然開鑼日「失蹄」，但剛周三（5日）已經起孖。

另外，開季前蘇偉賢明刀明槍磨馬搶灘，無疑至今只贏一場，但論鬥志個人認為反是三位中最高，可惜欠運氣之助跑了四個第二，不過仍值得短妙。

明日（9日）賢廐再派七駒上場，當中「麯院風荷」及「醒目再臨」分別在剛周三及開鑼日（2日）拚入亞軍匆匆捲土重來。

往績顯示季初勤跑為利好訊號，然而「麯院風荷」四日前耗盡一兵一卒輸影相，七歲馬恐不及回氣，相反第七場「醒目再臨」上季於田草千六爆冷贏馬，開鑼日揀千二出賽，相信以開氣為主，但身處弱組兼跑出剛季贏馬時表現指數夠贏有餘，大戶一樣照賭。

結果「醒目再臨」靠預期跟得較前，末段亦爆得起交出21秒9快拉士後追奪亞。事隔一星期蘇偉賢安排增程角逐一哩，才是真正目標所在，當然可寄望「醒目再臨」再進步重啟勝門。

至於另一匹賢廐馬第九場「鐵胆王」，上季十一月評80分於三班泥地千二直領到底，但今次竟可減到69分再戰同班同程，全因馬房自二月起全力減分，從當中七次出賽最熱亦有54倍可見，上述賽績並無參考性。

根據馬會記錄，「鐵胆王」五月尾提早唞暑，但早在七月十五日便告復操，較其他季內初出馬備戰期更長，埋門配潘頓勝出泥閘，今仗「鐵胆王」原庒配搭重返勝途，難道會三心兩意？