內地嘅黃金期貨上個禮拜三上市，之前已經要排長龍開戶，首日成交仲升停板，過去三個成交日，啲炒友係咪執唔少呢？又唔係喎!據內地《浙江在線》報道，呢三日喺黃金期貨市場上有七成炒友蝕錢，賺嘅得三成人，而且多數係老手，所以話薑都係老嘅辣。
《浙江在線》話，整體市場嚟講，有七成人都要蝕。佢哋又訪問咗間永安期貨公司負責人，對方話佢哋嘅客仔雖然有六成人賺錢，但當中幾乎冇一個係新開戶嘅客，即係話賺嘅都係老手，新丁就要交吓學費先。
新丁損手衰喺邊？咪係將期貨當股票咁炒囉，見黃金期貨首日升停板，諗住好似股票升停牌咁，第二日好大機會爆升，咪入市追好倉囉，點知開盤後係咁跌，佢哋被迫平倉。唉，連遊戲規則都未搞清楚就入場玩，想唔蝕都難啦。