每逢選舉，總有一啲「假獨立，真建制」人士扮無黨派去參選，今屆區選撞正反送中運動，自然更多建制候選人扮獨立，但最叻起底嘅連登仔就仲勁，揪出一班「假民主、真建制」，等選民唔好被呃。有連登仔近日開咗個名為「【有圖逐個捉】同我認住佢哋！假獨立真建制人士已現形」嘅po，捉晒呢班人出嚟，重點被招呼嘅係喺西貢區議會、將軍澳都善選區出選嘅將軍澳民生關注組前成員李栢棠。

連登仔翻佢舊賬，發現佢2015年區選喺民建聯候選人嘅facebook畀like力撐，同年又幫民建聯搞新春街站，仲同新民黨容海恩一齊派揮春，種種迹象顯示呢個人相當可疑，呼籲選民唔好投錯票。

將關組：有人想人格謀殺

將關組回覆八方時就話指控嚴重失實，稱9月3日已非將關組成員嘅李栢棠當時係業委會主席，請咗民主派去屋苑活動，咁咪邀請返至少一個建制派；又話李2015年畀like民建聯嗰區，得兩個建制候選人，冇民主派，李都係揀個lesser evil，一如民主派選委喺特首選舉中撐曾俊華。至於容海恩嗰壇，當時容係屋苑住客，李栢棠都係禮貌上有畀佢搞吓活動，懷疑因為選舉鬥爭，有人想進行人格謀殺。

已經報名出戰都善嘅民主黨莊榮輝早前話，李栢棠喺2015年為民建聯成員助選，難以令人信服其為民主派，所以無法與對方協調，李栢棠其後有發聲明反擊，批評莊將佢「抹黑」成為建制派嘅人。八方相信，最有發言權嘅都係當區選民，11月24日若如期選舉，記住用選票發聲。而冇申報政治聯繫嘅建制派張展鵬都報咗名爭連任。

李八方