【貼埋錢髹牆整電掣】帶齊證據見傳媒 陳展鵬指業主出爾反爾在先
欠租業主陳展鵬
今午陳展鵬帶齊相片Print out、WhatsApp對話截圖見傳媒,交代其一方事件版本。
陳展鵬稱:「一開始嘅時候個感覺好好嘅,一開始嘅時候我就叫媽咪租咗個單位,咁啲櫃嘅位唔係好啱用,所以(最初)我哋冇租到。之後再撞番個業主,佢話:『陳太,如果你租嘅話,我哋拆晒啲櫃吖!』總之喺佢間屋裡面,你唔改佢啲則呢,你點都得嘅,冇所謂。係咁樣講嘅。」
「咁好啦,咁有誠意,一個信字,咁就Settle好啲嘢先啦,冷氣嗰啲,因為佢(業主)都喺嗰度住咗好耐。咁跟住OK喇,簽約喇。拆完啲櫃之後,佢啲櫃係入牆櫃,啲牆紙全部好污糟,啲牆未油油。我話唔緊要,你拆咗個櫃,我可以畀錢,幫你油番佢,OK?」
解決完入牆櫃,仲有跳fuse問題。陳展鵬勞氣地謂:「啲燈係咁跳fuse,我有單有據,有相有證明,每一次我叫佢整,佢就話搵師傅嚟啦:『但係啲料應該都OK 0架!你搞得掂嘅。』咁唔緊要,有啲嘢我都可以試吓,但電嗰啲我真係唔識,搵朋友買啲,有單寄晒畀佢。你諗吓,我畀錢去油油,整嘢又有單有據寄晒畀佢,我又點會做呢啲嘢(指欠租同整爛地板),我仲要喺維景灣畔住咗咁多年。」