買中一隻升嘅股票，唔好計贏幾多，心情就好像買中頭馬一樣咁開心，如果係冷門，就更加多兩分興奮。
噚日大市下跌，上個禮拜推介嘅中保國際（966）就開車，逆流而上，最高6.78元，收6.72元，升0.49元，升幅7.8%。呢隻本來係冷門股，但噚日成交就大增到1450多萬股，今次一支大陽燭破位而上，短線好大機會見8字頭。
中保係基金股，揸呢類股票，要有超級耐性，同時仲唔好俾佢哋嘅波幅震咗出去。中保噚日發力，但只算係熱身，未起步，中資人士有信心股價可以倍計上升（即係12元至20元），揸實佢，明年可望獲厚利。
開心完，講番啲心翳嘢。中糧國際（506）跟市回軟，跌3.2%。中糧又係基金股，幾時升，幾時跌，佢哋話晒事，但中長線始終係向上。
內地地產股升勢再起，但南海控股（680）就繼續升後整固，不過成交已縮到只得1億股（銀碼只係600萬），睇勢調整好快會完成，再破位而上，短期目標7.7仙，中線可見10仙。
新股盛高置地（337）跟大圍升勢，收5.7元，創出上市後新高。經行使超額配股權後，盛高發行10.37億股，公眾人士佔2.87億股，貨量唔算多，消息話基金一集齊貨就會砌上去，初步目標價係7.5元至8.0元。

14倍PE可見7.7元

盛高上市已8日，第1日成交已8855萬股，之後曾縮到690萬股，噚日又上番3680萬股，8日合計共有2.45億股轉手，街貨已收亁，基金好快做工夫。
集團已發展同現正發展嘅6個上海項目同1個黃山項目，總建築面積246萬平方米，06年估計盈利不少於3.6億元人民幣，07年估計可上升至5.7億，每股盈利折約0.55港元，以內地地產股平均約14倍PE計，股價可見7.7元。
郭兆誠