李斯特城都攞到英超，今年會唔會係繼2004年後嘅國際球壇奇蹟年呢？就要睇吓今屆歐國盃邊隊捧盃嘞。要估一隊你估唔到嘅球隊捧盃，本身已經係一件幾難嘅事，因為咁易估到就唔叫奇蹟啦。不過，小弟嘗試用數據去協助分析，搵出今屆冠軍。
戴定頭盔先，本文非嚴謹科學，估錯咗實屬正常呀！小弟睇番近幾屆歐國盃冠軍隊嘅平均年齡，發現近兩屆有年輕化嘅趨勢。1996年嘅德國、2000年嘅法國同2004年嘅希臘，陣容平均年齡都超過28歲，但到2008年同上屆，西班牙兩連冠嘅陣容平均年齡分別係26.12歲同26.85歲，都係27歲以下。

怕淨係睇歐國盃唔準？參考埋世盃，2006年意大利封王嘅陣容平均年齡去到28.21歲，但2010年嘅西班牙跌到得25.91歲，到兩年前德國贏冠軍嘅平均年齡就係26.3歲。
如果信呢個趨勢，嗰啲平均年齡28歲以上嘅「老餅隊」應該冇運行，平均年齡26歲左右嘅球隊就好有機會拎冠軍。其實，今屆歐國盃24隊入面，得四隊嘅平均年齡喺27歲以下，分別係25.81歲嘅德國、25.86歲嘅英格蘭、26.13歲嘅瑞士同26.44歲嘅比利時。
根據足智彩嘅冠軍賠率，德國、英格蘭同比利時都係五大熱門之一，冇乜肉食，所以如果要冷選，會揀剩低嘅瑞士，家陣都有35倍。瑞士呢隊波向來低調，但陣中大部份球員都喺歐洲四大聯賽搵食，個個都有番咁上下實力，話唔定可以拎冠軍。如果要揀多隊，可以留意平均年齡27.34歲嘅威爾斯，冠軍有90倍。
文：咖喱