沙士期間，響應政府同導演會聯手發起的「1：99電影大行動」，陳果找來Shine，每人收$99，用四日時間拍了短片《小豬不舒服》。影片其中一個取景地點，是圓方對出的天橋，劇情設計又南與天佑帶隻豬坐的士出九龍，這也是小豬第一次出街，由天橋可以睇到香港全景。

由圓方那條天橋，去到長江睇景，陳果在回程機上有兩聲咳、冇胃口、戴上口罩，結果被誤為帶菌者。

陳果說：「我助手衰多口，叫空姐俾杯水我飲，話我唔舒服，咁就大鑊，到埗後所有人落晒機，到我落機時，已經有救護車醫護人員等緊我，捉我上車即場檢驗，當正我帶菌者一樣，檢查後得知我係有少少發燒，自己都嚇親，有乜事就要即刻送入院，呢個係『幾得意』嘅奇遇。」

今日陳果又戴上那個熟悉的口罩，思潮飛得老遠：「我記得嗰陣香港國際電影節4月舉行，我做講座，台下所有人戴晒口罩，好壯觀，嗰陣係高危時期，呢個情景，幾後悔冇影一張相。」

當時口罩人人不離手，陳果笑道：「其實內地好普遍，只係香港人少用，所以王家衛有套電影，張曼玉一戴上口罩，就覺得好outstanding。不過沙士之後就改變晒，呢樣都係好處，可以話係對社會反射作用，有少少貢獻。」

今時今日，如果香港再需要演藝界站出來作一次大行動，還會有人響應嗎？問陳果，陳果攤攤手：「呢個假設性問題，老實講，真係唔知，可能你想出（嚟），人哋都唔俾你出啦！唔係我問題。

「我覺得有咩事香港人要企出嚟幫手唔係難，只要有人吹雞號召就得。冇政治聲音咪冇事囉，總之天災橫禍就唔好分啦！」

採訪：卓寶花
攝影：陳俊強
攝錄：廖達燊

《蘋果》沙士15周年系列網站，正式登場：
https://hk.feature.appledaily.com/sars15/