剛由車路士轉投曼聯嘅尼曼查馬迪，周二首次跟新隊友一齊集訓，雖然撞正係佢29歲生日，但初來報到梗係冇揸流灘，全程仲要孖住前車仔隊友桑馬達一齊。

曼聯周一宣佈馬迪入「魔」，成為今夏第三位新兵，而呢位塞爾維亞中場周一簽完約，周二早上已經出現喺卡靈頓訓練場，進行佢過檔新東家嘅首課操練。

成班新隊友中，馬迪最熟當然係之前同樣效力車仔嘅馬達，不論拉筋、跑步，都黐實呢位西班牙球員。另外，8月1日啱啱好就係馬迪牛一，步入29歲第一日就換上新環境，好多嘢可能要慢慢適應，但唔知班球會工作人員或隊友，有冇為佢預備生日蛋糕，定抑或真係唔知呢位新隊友係今日生日呢？