《城市論壇》今日唞暑後復播，焦點有幾個，嘉賓名單有睇頭，皆因青年新政游蕙禎同民主黨嘅新星吳思諾兩位小花首度同場，吳思諾仲係首次「處女出戰」城市論壇，兩人令充斥維園阿哥阿伯嘅《城壇》，可觀性大為提高。加上另外兩位女嘉賓都係女將，包括民建聯荃灣區議員林琳同西貢區議員方國珊，四個女人圍住一個男主持蘇敬恆，場面即使唔係空前絕後，但一定係相當罕見。

游BB同吳思諾兩位小花席間合力反駁林琳呢位共同「敵人」，合作愉快。節目完結後，游BB話呀，真心覺得吳思諾幾靚女，並話自己同佢，市場唔同喎。咁有咩唔同？佢話留番比大家去定義喇！游BB期間都記掛不斷喺《城壇》外面「問候」佢嘅伯伯，因為大熱天時要大嗌大喊，游BB都覺得伯伯都好慘：「陰公，入唔到場，要喺出面嗌，佢哋好辛苦。」

本身係大律師嘅吳思諾首登《城壇》，佢話只係有少少緊張，感覺OK，「上court（法庭）緊張啲。」佢話事前都有問過黨喺唔同事件嘅立場，但其實最終佢都係暢所欲言，冇咩需要避忌，強調自己真係做過功課，所以喺論壇上提出成立好似「青年議會」，規定政府要聆聽年輕人意見。而51歲嘅方國珊席間特別強調，覺得自己仲係青年。

除咗台上呢四位女士，台下有位靚女亦好吸晴，就係港台節目《早辰‧早晨》主播陳月慧，據聞佢即將接替稍後料入熱廚房做政助嘅蘇敬恆擔任主持，難怪要到場取經，做好準備。至於蘇敬恆，續冇回應入政府嘅問題，話冇新消息同大家公佈。