華爾街股市前晚急升，港股爆上2萬點的可能性毋庸置疑！昨日甫開市即爆上20063，創出今年新高。雖然收市未能企於2萬關以上，但成交升上836億元，後市重上過千億元成交指日可待，預料熱爆全城之金隅股份（2009）掛牌當日，港股成交增至過千億元的機會最濃。

今個月初，本欄曾推介銀基集團（886），等足半個月，銀基昨日終於爆發其上市以來最漂亮升勢，急漲14.8%，報3.48元。炒股要視乎時勢而調整策略，若然換轉係03年前後熊市環境，類似情況星俠唔會浪費時間去等，因當時環境唔就，持股隨時被「陰乾」。家陣唔同，股海資金氾濫，落後股份總有一日輪到佢炒，用閒錢炒股梗係要同隻股份鬥長命。
內房股仍係市場焦點，世茂房地產（813）昨日急升7.4%，報15.82元。世房本月初升至16.32元，借內地收緊第二套房貸消息回調，一度低見13.20元；隨後在14元至14.80元之間上落，昨日走勢明顯見突破，整固料已完成，新高在望，現價可追，目標20元，跌穿13元止蝕。
世房今年已完成重組，將商業物業注入集團間接持有64%、於內地A股上市的上海世茂股份。另外，世房上半年銷售額超過130億元，已達全年銷售目標70%以上，預期今年全年銷售將超標。
方星俠