中貿林久不露面，突然現身於中午飯局，左丁山即刻問佢：「係唔係自北京返嚟？」中貿林騎騎笑：「最近都冇去？唔使驚。我自馬場返嚟至真！」睇佢咁樣笑法，唔使諗都係大有斬獲嗰隻，問佢中咗乜？佢又笑到四萬咁口：「我好佩服夏佳理主席嘅……」哦，梗係「駿河」中到正啦。
北京有應付沙士經驗，照計唔使驚。最怕係安徽省呢啲地方，安徽醫學生上京訪問沙士實驗室，發燒而無警覺，貿然坐火車來往，實在係害人，抵鬧之至。但最害人嘅，就係安徽阜陽市劣質奶粉，製造推銷劣質奶粉嘅奸商，殘害中國兒童，一定會受天譴，生仔女都會撞車死，自己亦身後蕭條。至於收賄款，詐諦睇唔到劣質奶粉充斥市面嘅官僚，當然唔會有好報。

投資M記得小時候家境不佳，餐餐食豆豉鯪魚、五香肉丁、午餐肉配即食麵嘅日子，佢話：「當時呢啲罐頭最平，點解嗰陣時冇假貨害人呢？」經濟師L話：「當年中國一窮二白，冇人識投機發財，況且發財就會俾群眾批鬥，做假貨，冇誘因啫！」唉，今日中國儒家價值盡失，馬克思啲勤樸之風無存，資本主義嘅新聞自由、市場監管嗰套冇學到，是故偷呃騙成風，發達無罪，搶錢有理。
投資M最近清掃家中廚房嘅內地食品，甚麼牛奶、罐頭、豉油，一概當垃圾咁掃走晒，左丁山亦有樣學樣，但頭痛嘅係，內地食品太多，掃之不盡，亦唔方便，遑論替代成本甚高，惟有盡量少吃中國食物嘅製成品。