近排美聯集團（1200）真係多風雨，上個禮拜突然爆發「圍堵事件」，數以百計代理聚集總部，有人話疑似兵變，有人話係員工爭取佣金福利等行動，傳言滿天飛。話晒係上市公司，若果事件升級，對公司聲譽好大影響，管理層上個禮拜拿拿臨決定成立制度檢討委員會，狀似平息風波，穩定軍心為上。
事隔幾日，美聯前晚突然出通告公佈高層人士變動，副主席黃錦康不再兼任董事總經理一職，由主席黃建業重掌番行政大權，處理番成個集團嘅整體運作同營運。查實，美聯董事總經理一職，舊年8月先交畀黃錦康，半年後又變番黃主席做。今趟高層調動，兩人薪酬冇變，坊間就有傳主席一位就快重選，但美聯方面話主席係由董事局成員委任，冇透露係咪就快要選過主席一職。