9歲香港「小巨肺」譚芷昀(Celine)由上年11月參加美國綜藝節目《全美一叮》(America's Got Talent)嘅AGT Skype audition(網上面試)，至今年3月去美國洛杉磯參加首次 TV Audition (電視節目面試)，然後喺今年中開始進行四輪比賽回合，前後經過八個月時間走到半總決賽，成為晉身及奪得Golden Buzzer(黃金按鈕)嘅首位華人。由於要去當地準備比賽，即使所有小朋友開晒學，佢都要停一停，由香港過去出戰。

Celine日前終於可以回歸校園，有學返喇!喺家人陪同下返港，隨即返學，Celine今次告假參賽，事前得到校方支持，所以佢回校嗰陣，獲老師及同學打氣，Celine向來熱愛讀書、唱歌、跳舞，雖然年紀輕輕，但佢明白能夠喺國際舞台上唱歌表演係好難得嘅機會，今次喺美國結識到一班AGT參賽者，每位參賽者都為自己演出下過無數苦功，大家都建立咗友情。

Celine現時生活像以往一樣，如常返學放學，放假溫書、做功課，閒時同妹妹Dion一齊玩，繼續最鍾意嘅唱歌跳舞，至於爹哋譚順生就話囡囡Celine喺AGT已全力以赴，表現非常好，喺譚爸心目中，囡囡得到經驗同感受過程，比起賽事成績更重要，所以譚爸覺得Celine已經贏咗；既然上天賜予囡囡歌唱才華，而Celine又鍾意，家人必定繼續支持。