曾經紅極一時嘅維園阿哥、馬草泥任亮憲復出喇，噚日佢宣佈參加立法會港島區補選，仲搵咗唔少知名嘅金融界人士幫佢站台，其中一個就係紅遍兩登討論區、人稱「沈大師」嘅訊匯證券行政總裁沈振盈！沈大師憑佢嘅實戰理論折服網民，一眾網上沈門弟子得大師明燈指路行相反方向，近日喺股市都執唔少，今次大師玩埋選舉，好多人想睇睇佢嘅燈力如何。

十金融猛人站台

話說任亮憲個記招有大師、周顯等約10位金融界人士幫佢站台，大家一齊叫吓口號、合個照咁，點知記招開始，大師就諗住走人，八方就梗係拉住大師，請佢分析馬草泥選情。大師亦有話直說，佢話任亮憲勝算只得兩、三成，一來香港眾志周庭、新民黨陳家珮分別有民主派、建制派喺背後發功，二來任亮憲都喺政圈消失咗一段時間，所以任亮憲係蝕底啲㗎喇。
咁如果係周庭同陳家珮之戰，大師又睇好邊位呢？大師諗咗諗話「五五波」，因為佢兩位都各優劣，周庭勝在民主派陣營支持，佢嘅立場可以攞到一定票，但因為周庭太後生，可能會因此流失少少中間票。至於陳家珮就好在有政績，較為啱港島區選民口味，贏面大啲。總之未來一段時間，佢哋兩位最重要係唔好講錯嘢或者做錯嘢就得喇。
聽到呢度，大師撐馬草泥，但話佢贏面唔高會唔會燈到馬草泥？佢仲話周庭同陳家珮係五五波，但似乎覺得陳家珮贏面大啲，唔知會唔會燈死陳家珮？

李八方