韓國女團少女時代(少時)嘅8位成員近年都分開各自活動，除咗泰妍近日舉行個人演唱會《TAEYEON solo concert "PERSONA"》外，秀英、允兒、徐玄等人就Keep住拍劇。而允兒孖《未生》男星任時完、韓版《步步驚心》男星洪宗玄主演嘅MBC新劇《戀愛中的王》，劇組辛苦咗半年終於上周四煞科，允兒更上載與劇組嘅大合照到Instagram，為7月播出嘅新劇宣傳。

而今年踏入出道10年嘅少時，其所屬事務所今日亦公佈好消息，表示組合將會舉辦10周年紀念粉絲見面會：「屆時見面會上成員除表演歷年經典歌曲外，亦會表演新歌，又會與粉絲回顧出道10年嘅點點滴滴。」至於10周年紀念專輯就延至8月先推出，8位成員預計本月尾拍攝主打歌MV。

另外，泰妍、允兒、Tiffany等人今日孖同門師弟團SHINee嘅溫流、鐘鉉及NCT等人現身韓國金浦機場，飛到濟州島出席所屬嘅SM事務所舉辦嘅Workshop，引粉絲追星。