曾志偉目前身在外地，對於能夠投番大部份梅艷芳生前物品感到高興，有指今次拍賣共花費300至600萬元，志偉表示阿梅所有的朋友都唔認同今次拍賣，無論坊間傳言用了幾多錢都唔重要，最重要係佢哋用咗合理嘅價錢，投番343件阿梅生前極有紀念價值嘅物品，包括「1982年第一屆TVB新秀歌唱大賽冠軍獎」、「第4屆香港電影金像獎最佳女配角獎」、「第8屆香港電影金獎像最佳女主角獎」、具紀念性嘅唱片，仲有阿梅隨身多年嘅佛珠同埋好多件佛教珍藏品等等。

志偉話：「阿梅有一個很傳奇嘅演藝人生，依家可以攞番有紀念性嘅物品，希望後人可從中了解佢嘅人生有幾傳奇。」

除咗志偉外，有指譚詠麟、張學友、成龍等都有出錢幫忙競投，志偉話每個朋友都好有心，但佢哋都唔想被公開個名，就算冇參與今次拍賣嘅朋友，都係一個幫忙，佢話：「如果呢件事被炒熱，可能就要用天價先投得到，亦感謝傳媒喺呢件事上以公平公正嘅方式報道，令件事唔需要用天價解決。」

至於籌辦梅艷芳紀念館，志偉話等佢返港後，會嘗試同政府有關部門研究，用積極努力嘅態度去處理，但志偉坦言依家未有時間表，佢話：「喺我眼中，阿梅喺文化、藝術同演藝界入面，係一個全面而又能夠揚威海外嘅香港人，我哋必須要為佢開設紀念館，俾更多人認識佢。」

而喺成立紀念館之前，阿梅嘅物品會由演藝人協會代為保管，有需要時才會公開。