四洲集團（374）創辦人兼主席戴德豐（戴生）一向作風低調，噚日集團旗下首間「無人零食物語」期間限定店喺旺角開張，吸引咗唔少傳媒採訪，場面好虛冚！戴生一聽到記者問有關零食嘅問題好有興趣，佢話自己70歲，仲日日食緊零食，最鍾意就係食紫菜！

問答環節嘅時間，主持叫記者先舉手再問問題，點知戴生就先舉手，同在場朋友推介四洲粒粒橙果汁，話記者後生可能未飲過，但一定要試下！四洲最出名就係紫菜，戴生話，公司最近出嘅新品夾心紫菜，係佢idea嚟，推出夾心紫菜證明咗零食係千變萬化，好好玩同埋一種好好嘅享受。

雖然已經70歲，但戴生話自己仲日日食緊零食，食零食係好開心嘅一件事，開心就會健康。佢特別鍾意食紫菜，因為紫菜本身好有益，如果夾埋啲芝麻、南瓜、堅果就更加有益。

零食物語第一次開無人店，戴生話，同另一合作伙伴，內地無人智能便利店營運商兼技術提供商EasyGo創始人林樂昌識咗一年，大家都好投契，傾嘅過程好順利，至於之後無人店會點發展，戴生話今次係一個體驗店嘅形式，主要係想畀香港市民體驗一下喺無人商店購物嘅樂趣，將來會唔會開無人實體店，之後先再研究喇。

全球樓行 Dream House零距離
https://hk.feature.appledaily.com/overseasproperty