現年31歲嘅倪晨曦同圈外男友「V先生」拍拖兩年，感情穩定，趁住噚日係2018年最後一日，喺Ig分享一條男友喺巴黎跪地求婚片段，留言：「我想了很久很久這件事是人生中那麼重要的時刻，也是今年讓我感觸最深的一件事，想要分享給你們，那就是我訂婚了！」倪晨曦憶述大約兩個月前到巴黎出席時裝周期間，男友求婚一刻，自己個腦一片空白，因為朝早仲WhatsApp講緊晚安，點知個人瞬間出現。佢仲笑住話唔記得男友講過啲乜，只係知自己勁喊，但都好感動：「他總是默默的在我身邊不斷的付出，給我一個溫暖的避風港，這個全世界對我最好的男人，永遠都把我放在他前面，包容我、照顧我，對自己總是超級節省，但把最好的都留給我，上輩子一定是做了甚麼好事，這輩子有這樣的疼愛，原來安定下來的心感覺是那麼的踏實。」

睇片再次感動

倪晨曦接受訪問時，心情依然激動：「揀今日其實我寫緊今年紀錄，再睇一次條片，我都再次感動到，發生咗一件咁開心嘅事，無論我嘅工作做多幾多、其他方面幾大成就都好，一件人生大事，影響咗我好多嘢，2018年發生，我冇同大家講過，所以就喺12月31號呢一日，話畀大家聽。」佢話計劃今年舉行婚禮，但詳情未決定到。
撰文：馮仁昭