新特蘭課金先搵到人接爛班子，反而幫莫耶斯製造就業機會？「黑貓」周四公佈，向另一英冠球隊普雷斯頓賠償75萬鎊（約750萬港元），挖走對方47歲領隊加利臣（Simon Grayson）出任主帥，雙方簽約3年。自2005年起展開領隊生涯、擁有600場執教經驗嘅加利臣，將會領軍飛往奧地利展開5日集訓營，為新球季力爭重返英超作準備，佢表示：「我好高興嚟到新特蘭呢間擁有美好歷史同傳統嘅球會，對領導呢間球會充滿期待，希望帶來昔日好時光。」

自從莫耶斯上月底劈炮唔撈，新特蘭喺尋覓新帥時障礙重重，先後俾鴨巴甸領隊麥恩尼斯同前李斯特城領隊皮亞臣請食檸檬，反而賦閒在家「莫天才」就好吃香，喺英國skyBET開出嘅下任普雷斯頓領隊賠率，莫耶斯被列為4.3倍第三熱門，至於2.75倍大熱就估你唔到，竟然係早前獲委任下季帶領利物浦U18嘅紅軍名宿謝拉特！3.5倍次熱就係前韋根、列斯聯領隊羅士拿（Uwe Rösler）。