唐詩詠今晚就同古天樂到金鐘出席活動，詩詠着住Tube dress谷胸到場，講到佢身材好好，佢就話：「只係條裙fit身，但都有帶Nude bra，有push up嘅，因為我自己不嬲都唔係豐滿嘅人，但我就唔驚會走光囉！」

剛同洪永城分手不久，記者就問到佢o依家嘅感情生活，詩詠話：「o依家忙緊拍劇，嗰啲就慢慢嚟啦！」之前就有報道話古天樂嘅電影公司有意簽詩詠，古仔出席活動時已經話自己只係演員，簽藝人由導演決定( 新聞連結： http://bit.ly/2sh86v5 )。問佢呢次係咪講古仔想簽佢後第一次同場出席活動？佢話：「係呀！」記者笑佢一陣會唔會自薦？詩詠就笑住話：「等我整好啲個CV(履歷)先，其實真係冇傾過，雙方都冇傾過，自己都想同古仔喺電影上有合作，因為佢係一個出色嘅演員。」

問佢同古仔合作，可擔心傳緋聞？詩詠就話：「唔會啦！呢啲都係娛樂新聞，大家好咁心急啦，幫我搵(男友)。(O依家係咪身價千萬？)有啲嘢唔可以用錢嚟衡量，要睇個發展空間係點囉！同埋工作理念係咪相近，若果加啲誠意金就梗係好啦！」

提到佢同洗米華頭馬盧啟邦緋聞，記者問詩詠有冇同對方見面，佢即刻話：「呢排都係忙緊公事，拍劇，好難同其他人發展，自己都係工作為先，其他嘢都諗住。」問佢再拍拖會唔會再揀圈中人？「可能啩，緣份嘅嘢好難講，但始終同圈中人拍拖壓力都比較大。」詩詠亦承認，自從《不懂撒嬌的女人》後，真係多咗唔同嘅工作搵佢。