王敏德和馬詩慧的16歲幼子王躍穎，最近宣佈與拍拖3個月的女友Mimi甩拖，但卻不愁寂寞，前日凌晨，他一拖四出巡中環蘭桂坊，全黑打扮的Kadin，身邊有4位長髮美少女跟隨，八玉腿相伴，位位打扮青春，背心熱褲、超短裙，而其中一位，更是拍過寶礦力廣告的女模特兒Audrey。

型仔Kadin與四美少女浩浩蕩蕩到夜場PLAY，由於正值放暑假，現場不少後生仔女等入場，當Kadin等預備入場時，PLAY工作人員要求收取每位200元入場費，四美少女不想付款，Kadin則沒所謂，一行人在夜場外打個白鴿轉便拉大隊離開。行開不久，有同行女提出翻兜講價入場，工作人員堅持收費，他們失望而回，其實Kadin也未夠歲數進場。

五人敗走後站在街頭吹水，Kadin說：「算啦，唔玩，你哋玩！」穿着吊帶黑衫襯白熱褲的少女，似乎對Kadin很嗒糖，捉着他說：「不如轉場玩啦！」Kadin未有動搖拒絕，堅持撇甩四女：「你哋去玩啦，havefun！」他跟該女伴擁抱一下，便獨自由行去ifc搭的士返回跑馬地寓所。

對於Kadin一拖四夜蒲老蘭，其母馬詩慧昨在電話表示囝囝有備案：「佢有話去老蘭，冇話去club，老蘭唔係全部唔好，都有hangout地方，有正常社交。不過嗰啲地方要18歲先入得，因為有酒牌，佢16歲唔入得。」馬詩慧給與子女很大自由度，她說：「以心比心，我唔會想人哋管住晒，調番轉細路仔更加唔想。」母子關係如朋友，有商有量：「佢哋都大個，有自己私隱，我會尊重。」

Kadin不夠秤未能夜蒲，馬詩慧爆料：「家姐笑佢多啲，我教佢點解唔開家姐個名，可能畀入。」Kadin知難而退，即使被女伴游說都不為所動，Janet取笑：「唓，可以點？佢都入唔到，冇得夾硬嚟，因為佢知道去第二間都係入唔到！」