陳少霞同老公李文輝噚晚出席葉家寶任職總監嘅創世電視慈善晚宴，同場仲有黎燕珊、尹天照、劉錫賢同已故影星喬宏太太小金子現身。提到下個月就係兩人結婚周年紀念，李文輝話正籌備點慶祝：「搞Party或者去旅行都考慮緊。」兩人都係虔誠基督徒，但佢透露全因為太太先令自己更虔誠﹕「係上天派少霞嚟教導我，感謝主俾我一個咁好嘅太太。」

講到旅行，佢哋就話好想去耶路撒冷朝聖，少霞話﹕「我哋一路都好想去，但因為需時好長，要差不多三個星期，而且要禱告祈求平安先決定幾時成行。」問到少霞有冇興趣嘗試演出福音電影，佢話：「想㗎！但演技生疏咗好多，拍福音電影係好有意思，都想試吓。」身邊嘅老公亦都話好支持佢，咁有冇興趣夫妻檔一齊拍？佢笑話：「我唔係呢啲材料啦！不過睇神嘅安排。」

至於葉家寶就話晚宴目標係想籌得1300萬作團體搬址同裝修費，另外亦希望籌3,000萬作傳福音經費。當年家寶做亞視執行董事時要為員工出糧「撲水」，o依家喺新崗位又要重操故業，佢話：「相信係上帝嘅考驗，其實呢個團體一直有基督徒奉獻，只係咁啱o依家要搬遷，所以要特別嘅經費，咁我之前告急都可以迎刃而解，有信心會解決。」

另外，專程嚟支持家寶嘅黎燕珊，就透露日前喺囝囝謝師宴上憑歌寄意表達對媽媽嘅謝意，珊姐話囝囝平時好少講冧嘢，所以都即場感動到喊。