F1今季有法拉利復甦同平治一決高下，其中維特爾同咸姆頓喺車手榜鬥得頭崩額裂，周日阿塞拜疆站更加正面對撼！當賽會喺第22圈出示紅旗，車手返回維修站前，咸姆頓喺第15號彎出彎前疑似故意慢車，令其後嘅維特爾撞上，後者舉手示意不滿之餘，並從側邊「軚貼軚」同咸仔再次碰撞。雖然維特爾最終以第4名力壓第5嘅咸仔完成賽事，將車手榜優勢擴大至14分，但佢因為被判危險駕駛而加咗3個罰分，一年內已經累積至9分，只差3分就要被罰停賽一站！賽會同時指咸姆頓嘅車速未有明顯加減，因此「刻意測試煞車」指控並唔成立，毋須處罰。

雙方賽後繼續針鋒相對，維特爾話：「我哋冇得用無線電溝通，但如果要被罰，就應該兩位車手一齊罰。我對佢呢吓『煞車測試』梗係唔高興，所以駛向佢側邊舉手示意唔係咁玩法，結果造成些微碰撞。佢幾年前已經喺中國站某次重新開賽時做過類似嘅嘢，但呢個唔係適當嘅比賽方式。」咸姆頓亦不甘示弱反擊：「如果佢想證明自己係一個男人，我哋應該落車『隻揪』，任何形式嘅危險駕駛都會令另一位車手陷入危險。好彩我哋當時駛得慢，否則情況可能會差好多。諗吓有幾多細路今日睇緊F1，然後睇住一位四屆世界冠軍做啲咁嘅嘢，已經說明咗一切。」