邊個話香港車市低迷㗎!若然你有去上個周末嘅平治E-Class預展,場面都不知幾熱鬧,聽聞三日車展期間,就經已收到成二百部車嘅Order,而且大部分重係E320同E500㖭!之不過,今年表現積極嘅平治,又點會咁快收夠籌呢!嚟緊年中佢哋除會火速運嚟右軚版新E-Class到港外,今年另一款會正式推出右軚版嘅Smart迷你小車,亦會同期抵埗都唔定;呢部近年響歐洲大行其道嘅迷你CityCar。雖然佢嗰分驚豔度,經已不及當年面世嘅時候;但若然車價吸引的話,相信對近期迷你車大熱嘅香港車市,亦會起有一定刺激作用㗎!