咪以為打工仔要做百萬富翁難過登天，原來坊間有唔少隱形富豪，平日都係過住啲簡樸嘅生活、慳家致富。
喺《MSN》討論區，有網民就揭開佢哋嘅慳錢大法。dancinmama話：「我會儲定購物印花、剪存贈券或購物優惠券，亦會趁大減價買定日常家居用品。就算間中要同屋企人出街食飯，我都幫襯有折扣優惠嗰間。除咗買樓之外，我一定會用現金買嘢，亦唔會貪免息分期而購物。」
事實上，吃喝玩樂往往佔整體開支好大比重，要慳錢又唔想生活乏味，就要喺呢方面做功夫。網友Former_Roomate_99嘅經驗都幾值得參考，「好多年前，我已經開始去圖書館借書同睇影碟，得閒又會去附近嘅藝術館參觀、到公園散步或參加其他免費文娛活動，有時夜晚會約埋一班朋友打機、傾偈，全部都唔使錢。有需要購物先會去行商場，絕對唔會因為悶而流連購物中心。」

圖書館睇碟　帶飯返工

GolfingGirl亦分享咗幾招慳錢大法，包括：每周找清卡數；如果預算用嘅錢使得七七八八，就要立即停止消費；想買嘢要先格好價再出擊；趁減價買耐用品；唔買任何專利產品；全家日日都帶飯返工或返學，好少出外用餐；穿着大路款式衫褲，唔怕過時要換季；每次加薪、出花紅或退稅，都會用嚟還樓債。佢仲話：「咁樣做不單令我哋擁有一架已經供滿嘅車、一筆龐大嘅退休儲備、一間有泳池嘅大屋，我仲可以晚晚有覺好瞓！」
不過，PrincessLeia就有另一番見解：「熱心公益，慷慨解囊幫助有需要嘅人，可以減低自己對物質生活嘅慾望。所謂『健康就是財富』，想享受優質嘅生活，就應該先好好保重身體。」