李克勤、周國賢（Endy）、AGA噚晚喺灣仔會展為「拉闊音樂會」擔任表演嘉賓，克勤彈結他，Endy拉大提琴、AGA彈鋼琴一齊合唱《只想你會意》，為音樂會拉開序幕。

佢哋互唱對方嘅歌，全晚有8成半嘅歌都係重新編曲，克勤話最初定歌單時，第一首寫下要唱嘅歌就係AGA寫嘅《鑽石人生》，AGA話：「《鑽石人生》係我第一次專為一個人寫，當年我寫咗3年歌都冇人要，一直賣唔出，最後我試寫歌畀人，通宵寫出《鑽石人生》，第二日首歌就有人要。」

到Endy彈結他唱歌時，克勤就笑話：「點解你彈結他咁型，而我係『扮型』呢？」又笑言：「周仔有種魅力，唱人哋嘅歌可以唱到首歌屬於佢咁，頭先我喺台下聽，其實首歌係屬於周仔。」Endy接住話：「我夠唔明克勤可以唱歌唔使抖氣，你又冇巨肺。」克勤即玩食字：「我係『廢』嘛！其實因為你要一邊彈一邊唱，而我係搵咗好叻嘅郎朗伴奏。」

跟住兩個爸爸講講吓又講起仔女經，克勤問Endy：「你有三個女，一定都好得，我雖然唔得，但我太太靚，可以安排認識下。」

佢哋仲揀咗玉置浩二嘅《李香蘭》、《月半灣》、《沉默的眼睛》三首歌嘅日文版唱，最後再一齊合唱日文版《夏日之神話》。去到尾聲，當AGA要鳴謝主辦單位時，Endy突然望住AGA話：「我想插你少少。」講完之後，佢已經發覺自己講錯嘢，即刻大笑。克勤笑話：「唔緊要，我都衰過一次，仲唱歌唱到o依家，冇事嘅。」Endy話自己尷尬到面都紅晒，但AGA依然一臉茫然。

完騷之後，3位歌手接受訪問，提到Endy失言，佢超尷尬話：「唔好提啦！太太唔識廣東話，唔會明。」問AGA明唔明？佢就話自己get到啲。克勤即幫手轉移話題：「個騷大家出奇緊張。」AGA話自己喺後台用ipad練彈琴，Endy就話自己不停背《我不會唱歌》歌詞。

另外，問到克勤係咪想同Endy對親家？克勤話：「係呀！」不過Endy啲女已經好大個？克勤再笑話：「年齡唔係界限，依家玩下啫！唔好諗太多。」

精選娛聞，喺晒《娛果》
http://fb.com/appledailyent