吳鎮宇、張智霖、佘詩曼同周秀娜等噚晚喺尖沙嘴出席《洩密者們》首映禮。 提到前晚薛家燕大排筵席娶新抱，有份出席嘅阿佘就話同媽咪一齊參加，佢仲話現場好感動：「因為佢個仔好得意，仲好似baby咁，雖然成個場識嘅人唔夠一半，但係佢讀嘅宣言讀咗好耐，亦都忍唔住喊，我都忍唔住眼濕濕。」問到媽咪有冇催婚？阿佘就話冇。

而Chilam就話因為唔喺香港所以未能出席，感到遺憾，佢話：「喺視頻見到場面好感動，希望之後有機會請番佢個仔同新抱食飯。」

提到今次合作，三人有冇火花？佢哋就話之前曾經有合作，但係就好少碰頭，今次都係分開三pair人，但都有見下面。而鎮宇就話片中好多槍戰同埋飛車場面，問佢有冇危險動作？佢就話：「有，但係有替身，我都戥替身危險。」問到鎮宇係咪唔會再做危險動作鏡頭？佢就話：「唔係，我可以做好多危險動作，但係唔見樣就有替身，之前有導演氹我，我問係咪見唔到樣，佢就話我要用替身，好矜貴，呢啲都要畀替身賺嘅，嗰次係一樓跳落嚟，個替身都拗親，結果我就做咗替身嘅替身，好彩咋嗰個唔係我，因為個替身休息咗兩個月，如果係我老闆就會問點解唔用替身。」

至於問到阿佘喺戲入面有冇危險動作？身旁嘅鎮宇就爆阿佘同張繼聰有親熱動作場面，仲係喺車度，又爆阿聰練大隻都係為咗阿佘，咁係咪車震？阿阿佘就解釋話係追逐戲，仲係親身上陣，鎮宇又繼續爆話：「阿聰同阿佘講，佢話希望下一世可以同佢多啲對白。」身旁嘅阿佘就更正係下一次先啱。

父親節將至，Chilam就話會係上海工作，而鎮宇又爆金句話：「呢個世界母親節先係畀人重視啲，點解呢？因為父親係要嚟搵錢畀佢哋過母親節。」問到佢係咪有微言呀？鎮宇話：「我只係講出呢個世界嘅法則，父親節我都要開工，因為我母親等緊我，唔係佢會問候佢。」問到阿仔會唔會有乜嘢表示？鎮宇又爆個仔懶得就懶，爆個仔係肥仔，佢話：「前面好大個肚腩，但對腳就好長，黑人憎呀！」

另外，喺首映禮儀式中，鎮宇話最難忘喺馬來西亞拍攝時，經常碰到榴連及鴉片，佢話：「啲榴連又有刺，核又大，開嗰時要小心過拆彈專家。」佢又話當地有個榴連家族名叫林鳳嬌，搞到佢好好奇想試食。

精選娛聞，喺晒《娛果》
http://fb.com/appledailyent