LANCÔME原先邀請咗何韻詩為品牌宣傳，阿詩亦多次以個人facebook表示感謝，不過噚日《環球時報》一出，批評品牌搵「支持港毒」、「力挺藏毒頭目」嘅「何」做代言活動，即令LANCÔME火速「跪低」，兼發聲明割席(新聞連結： http://bit.ly/1XvwhyJ )。

作為詞人嘅周博賢噚晚喺facebook貼出LANCÔME母公司L'Oreal一份2015年年報節錄，稱LANCÔME為咗保大陸龐大市場，發聲明係「必需切割」，又指LANCÔME今次係曲線表明愛國心(新聞連結： http://bit.ly/1UCnlDt )

周博賢又指今次「LANCÔME召喚關公」事件，無疑直接影響到香港嘅創作與言論自由，為咗「重奪香港創作與言論自由」，佢認為香港要團結爭氣，將藝人同創作人從大陸市場中解放出嚟，首先當然要合力養活藝人同創作人，必須真金白銀支持，提議全港集資成立「民間文化局」，佢覺得香港藝發局之外，仲需要一個民間組織，多著重high-art，目前創作受制於政府資助同大型商業贊助嘅取向，有時更可能會將敏感作品「下架」，佢FF中嘅「民間文化局」係一個支持為香港隨心發聲嘅創作，不須依賴大陸市場維生。

此方案未知成唔成事，不過王宗堯就喺facebook轉貼咗周博賢呢個post，兼留言：「要養活返香港這個市場，重新做大光譜，市場在國際上重新得到認定。」