「花花公子都可以係好爸爸」
趙世曾摒棄亡父高壓民主待子女
有三名子女的趙世曾,有「花花公子」之稱,但他認為自己是個好爸爸。今天父親節他不談情說愛,只細訴與嚴父、已故船王趙從衍相處的點點滴滴,並大談現代父親要與時並進,家庭要民主。
趙世曾對父親、已故船王趙從衍的印象,絕對是一個嚴父,他說:「我father同mother一向好嚴,食飯唔可以留一粒米喺碗上,父親母親永遠係啱晒,冇得駁嘴,但係對我嘅一生係一個好好嘅訓練,令我好勤力、有信用、誠懇待人,令到自己容忍克制,唔會亂咁發脾氣。」
舊社會制度得自立觀念
上海家庭很有傳統觀念,有傳趙從衍偏愛長子趙世彭,與三子趙世曾更曾傳不和,趙世曾說:「唔可以話不和,係大家喺事業發展上有分歧。其實唔係剩係上海人,應該係一般中國舊式家庭都係偏愛長子,雖然對待有唔同,我會接受呢個制度。」
趙世曾續說:「其實父親一向都好想扶植我大哥,希望佢繼承家族船務生意,所以我大哥好依賴父親,反而令我有自立嘅觀念,而且我比較自由,我讀大學做建築師係我嘅choice。」
子女不同母管教有難度
趙世曾有一女二子,分別是與姚煒所生的趙式芝(Gigi)、與盈盈所生的趙式浩及與TerriHolladay所生的趙式正(Roman),三人現年分別二十四歲、十九歲和十歲,趙世曾說:「我會接受父親同仔女係友情嘅關係,open-minded先可以和諧相處,所以要compromise,唔可以好似以前咁用高壓手腕。
「一個家庭好似一個社會,𠵱家社會都唔可以高壓,政府都要聽民主聲音,所以家庭都要民主,仔女都要自由。」趙世曾亦坦言教導子女有一定困難,他說:「因為我三個仔女係唔同媽媽,加上除咗式浩,Gigi同Roman嘅撫養權係佢媽咪,所以仔女好難聽我說話。」
管教上,三個子女有不同的方法,趙世曾說:「佢哋以前細個,做錯事會有體罰,不過唔會太嚴重,好似式浩,咪畀少啲錢佢使,Gigi個人情緒化,講幾句重要說話佢會聽,而Roman有乜唔啱,我會打電話畀Holladay配合。」
趙世曾雖然口說對子女採取寬鬆態度,但亦有一定堅持及追求,他說:「我要求佢哋讀書要認真,好似Gigi我一向都希望佢讀碩士同博士,但佢鍾意搞公關公司,不過佢係一個女仔,我唔會迫佢。」
要知慳識儉老竇非金礦
對於Gigi曾訴說幼時零用錢不多,趙世曾說:「要佢哋知道使錢同慳錢係同樣重要,唔可以當daddy係一個夾萬或金礦,好似我細個就冇諗過老竇要畀幾多遺產我,最後我亦冇分過老竇啲遺產。雖然我一定會留番一啲保障畀佢哋,但佢哋一定要努力,唔好諗財產嘅問題。」
女伴車輪轉 可以生多個
趙世曾的「花花公子」形象深入民心,身邊女伴如風車轉,他說:「花花公子一樣可以係好爸爸,每一個人嘅生活方式唔同,我曾經有幾個機會考慮結婚,但我相信如果我結婚,都會離婚收場,令我財產上有好大損失,唔會有𠵱家咁開心,多姿多采嘅生活。」
向兒子授錦囊
問趙世曾是否不希望子女以他這種方式生活,他說:「呢方面我好自由,結唔結婚係佢哋選擇,雖然我都希望Gigi嫁得好,不過我唔會刻意做媒。至於式浩同式正,我會畀我意見感受,唔好咁早結婚,因為愈早結婚,感情經驗唔夠,揀錯機會會好大,好似式浩成日同一個女仔出街,我會同佢講,要轉吓女朋友先得。」
至於女朋友有否影響他與子女的相處,趙世曾說:「女朋友同家庭係冇衝突,你可以同樣愛你嘅仔女同老婆。至於時間,我相信我畀仔女嘅時間係多過佢哋畀到我,Gigi有自己社交圈子,式浩喺美國準備升大學,而Roman星期六同日先會見面。」
記者問趙世曾會否當第四任父親,他笑說:「隨緣,我已經有三個仔女,如果生多個,可以考慮,不過唔可以太倉卒。」
後記:米奇老鼠
最後問趙世曾的,是最傳統考驗親情與愛情之間的抉擇題,當Roman與女友Wendy同樣跌落水時,他會先救誰?
趙世曾毫不思索便說:「肯定兩個都會救,我游水咁叻,我一隻手可以救起佢哋。」趙世曾的頭腦就是轉得快。而他的細仔Roman就畫了一個貌似米奇老鼠的卡通,祝父親節快樂,Roman還說他的父親是一百分的爸爸,莫非在他心目中父親是米奇老鼠,快樂又可愛,為他帶來無限的歡樂。
採訪:RitaLeung
攝影:HoKwokHo
趙世曾對打籃球興趣強烈,兒子Roman亦受其遺傳。
趙世曾與TerriHolladay的情史,叫人津津樂道。 《壹週刊》圖片
(左起)趙世曾與現年十歲的兒子Roman,及十九歲的式浩在影樓拍照留念。
趙世曾來自大家庭,第三排中為其父趙從衍。 《壹週刊》圖片
去年九月趙世曾出席女兒式芝(右)舉行的活動,忸怩不願與姚煒合照。
趙世曾歷年來的女人如車輪轉,近來鍾情內地佳麗,現任女友Wendy便是一例。 資料圖片