其實林峯籌備今次國語碟已經成年,早前佢仲去咗台北拍攝四隻新歌MV,搵咗小師妹陳嘉桓做女主角。陳嘉桓因為喺MV度同林峯太親熱,搞到俾林峯粉絲狂轟,不過睇佢哋拍MV嘅相又真係幾親密,兩個人外形又好合襯,唔怪得佢哋會傳出緋聞啦。
今次林峯難得有機會出trip到台灣工作,原本佢計劃品嚐當地美食,點知因為太忙搞到日日都要食便當,林峯話:「不過同製作認真嘅導演同團隊合作就非常值得,特別係睇到咁有質素嘅完成品,真係令我讚嘆。」
不過拍攝時發生咗一件靈異事,事緣佢哋有日到偏遠郊區拍攝,附近仲滿佈陵墓,成隊人準備插上電源做準備時竟然全程冇反應,最後上香後先順利完成拍攝,真係驚嚇。