本地首富李嘉誠除了喜歡記者、喜愛講道理外，亦熱衷捐錢，尤其係支持教育同醫護工作。佢上個禮拜飛咗去英國，原來又係同捐錢有關。
話說李超人旗下之和黃集團同英國醫學委員會、英國癌症研究中心、劍橋大學，合作在「劍大」搞了一個癌症研究中心，名為「和記黃埔/MRC研究中心」，剛於上周六開幕，由李超人親自主禮。八方忽然省起超人都係「爵士」，果然對英國有貢獻，何況，劍大又頒過榮譽博士學位過佢，投桃報李好應該。
出席開幕儀式者，還有英國科學及創新部部長桑茲伯里勳爵，佢話好多謝超人咁慷慨。超人就話，個計劃意義重大，可以減輕眾多病人痛苦，所以佢非常樂意支持。況且超人咁多年來捐錢捐咗四十五億，唔爭在五百三十萬鎊（約值港幣六千萬元）。
八方只係好奇，同在超人王國內的「長江生命科技」呢排搞上市搞到㷫烚烚，點解今次呢個同劍橋又同治癌有關的研究中心唔係由長江生科資助，而係由和黃及李超人捐呢？否則就多一個賣點。


傳真︰2623-9278
電郵︰[email protected]