大陸最近連串政策打擊影視藝人、公司逃稅，同時又要壓壓演員天價片酬，其實好多製作公司都拍爛手掌支持官方去壓制演員片酬，因為咁樣可以留返多啲錢去做製作，北京一位著名電視導演同《蘋果》講：「依家投資公司將八成製作費都俾晒啲演員，只係剩番少少錢俾我哋做製作，你諗咁樣係咪唔健康。」

製作人以王晶監製、鍾少雄執導，余文樂、林家棟、任達華、胡然同伍允龍等演出嘅超級網劇《冒險王衛斯理》嚟講，此劇主要由愛奇藝投資，分三季拍，每季約十二集，每一集製作費約800萬人仔。

每集製作費約800萬，原本係好好用，但王晶請咗咁多卡士，聽講單王晶人工連演員酬金，都差唔多佔咗成本七成以上。如果呢筆酬金佔咗製作費咁多錢，咁好明顯套劇可以花喺製作嘅錢唔多，所以點解套劇出街係人都鬧係「五毫子特技」——啲特技係唔算落本去做。

如果將來啲劇有番個正常預算去做，唔使一面倒俾晒演員，事實上係健康好多，所以國家出手去管，一般電影人係贊成，唯一不滿係稅率由10%跳到42%就太瘋狂，仲要追番半年前嘅稅款差額，普遍影人認為應予寬限期、等大家去消化下件事才實施。

精選娛聞，喺晒《娛果》
http://fb.com/appledailyent