前教統局局長、現任行政會議成員羅范椒芬今日喺港台英文節目發表驚人嘅「免費性愛論」，話有年輕女子被誤導為前線示威者提供免費性愛，仲聲稱自己已經確認消息。不過點確認呢？有冇真憑實據呢？羅太係冇進一步解釋自己如何確認消息嘅。

政府經常譴責惡意造謠者。貴為前高官，咁嚴重嘅指控梗係要有證有據，唔係你講就「說了便是」架。可能股壇長毛David Webb對羅太呢種「說了便是」嘅指控睇唔過眼，今日下晝喺facebook發文，向羅太提出多個疑問：如果你（羅太）話佢哋提供免費性愛，咁佢哋應該點收費？Webb又質疑羅太性別歧視，問「你點肯定唔係調番轉男仔提供免費性愛畀女仔？」，定抑或雙方其實可能只係兩情雙悅你情我願？Webb最後話，以上嘅可能性皆非，事實係羅太純屬妒忌。

面對咁多質疑，羅太晚上終於回覆傳媒查詢，披露自己嘅消息來源係來自「一名可信的朋友」，市民可以自由選擇是否相信。