【新增圖片】

本港前冠軍騎師潘頓今晚（21日）頭場座騎「欖球鑽石」本應可勝，末段受阻跑第三，雖抗議對手得值，但只升上第二名不算有運。

直至第五場三班1200米，潘頓終於贏番場，憑沈集成馬房「晚風」後上捧走馬拉華度賽馬會挑戰盃，從而勝出個人全晚首場頭馬，單Win及組合獨贏A3分別派38及18.5元。

今季才抵港4歲的「晚風」1月底贏田草1200米開齋，今仗初跑谷草3.8倍，但仍稍稍唔夠潘明輝之「越感」3.7倍咁熱，不過跑落卻以大潘較醒，「晚風」沿途前置跑主動，一入直路冇耐已加速超越對手，輕輕鬆鬆贏0.5馬位，打響谷草頭炮兼在港第二次贏馬。

反觀「小潘」潘明輝策騎大熱門「越感」姍姍來遲追唔切焗做二奶，至於呢條大潘搭小潘Ｑ，係全場最熱一瓣只得9.3倍。

沈集成表示「晚風」1月配羅理雅贏馬後，有天試閘期間弄傷腳，用了不少時間治理，傷癒復出後三仗表現令人失望，尤其上場跑第九更是非常失望，所以今場安排初跑快活谷，希望給馬兒新鮮感，好好彩可以book定潘頓跑，他發揮一流守住黃金包廂位，值得一讚。沈集成希望「晚風」在餘下馬季再跑，爭取在二班勝出之額外獎金75萬元bonus（下季5歲不合資格），但一切看馬兒狀態而定。

沈集成這晚可算有運，頭場受惠於抗議事件，漁人得利贏「泡泡達人」，加埋今場以「晚風」捧盃，馬房起孖兼捧盃，打造近期代表作。

第五場二至四名順序為「越感」、「威風霸皇」及「手到拿來」，四重彩派6,628元。