既然係賽馬活動,又點少得簡sir(簡炳墀)嘅蹤影?冇喺鄉議局現身多時嘅簡sir噚日滿場飛,不時俾人問佢攞貼士。簡sir喺呢方面絕對唔吝嗇,所以好受鄉紳歡迎;之但係盛傳會重出江湖參選上水鄉事委員會主席嘅佢,被八方問到係咪嚟真時,竟然話冇貼士,強調鄉委會3月初截止參選提名後,一切自有分曉。
但簡sir依然不脫牙擦本色,話自己雖然喺鄉委會退休成8年,但以前都做過成十幾年上水鄉委會主席,現任主席侯志強以前仲係「跟」佢嘅㖭。佢反問八方:「你話我仲有冇實力(發音:食力)吖?」言下之意都極有機會再出賽。盃賽最終由7號馬「非常好」跑第一,發叔同發嫂親自頒獎。