官場上下近排除咗猛播回歸金曲《香港始終有你》，《AuldLangSyne》都好多人唱。廉署噚日擺咗四圍，歡送提早退休嘅專員羅范椒芬。羅范之前離開教統局時，攬住李國章哭成淚人，今次告別廉署，就冇咁戲劇性場面，一來相處唔耐，二來執法人員專業冷靜，將感情收得好埋。廉署按歡送專員慣例，送咗一本集齊羅范任內剪報資料同一本相集畀佢。羅范坐呢個位只係八個月（扣番請假應訊同假期，實得半年左右），加上廉署效率高，所以好快起貨。

除咗兩本「風都吹得起紀念冊」，廉署又送咗個「正義盾」畀羅范，呢個盾係廉署搶手紀念品，好多訪客同外賓都好鍾意，廉署一次過訂製大批以備不時之需，今次正好用得着。有廉署老友同八方講，羅范席間話會參加「廉政之友」，繼續支持廉署工作。羅范多年拍檔李國章冇得留低都要起身，據講佢聽晚約咗一班教統局高層食飯，觀音請羅漢，慰勞一班手下，但阿瑟王就冇預羅范，因為「廉政專員同教統局冇工作上嘅關係。」
教統局中人唔知諗到送咩畀阿瑟王未，八方越俎代庖有個建議，既然阿瑟王外號「打機局長」，送部遊戲機畀佢實歡喜，NDS易上手又好玩，閒來打吓，好過用部PocketPC打機啦；至於羅范，攞嚿「正義盾」返屋企好睇唔好用，其實送個口罩畀佢，仲要係《沉默的羔羊》嗰隻，等佢收埋把口，唔再做烏鴉。

其他被叮走局長都忙於同下屬話別，冬冬遲啲會同環保團體聚頭，佢仲要行走江湖，梗係要同環保專家保持聯絡，八方希望環保政策唔好人走茶涼，送套啦啦隊員制服畀冬冬，等佢繼續為藍天打氣。
至於王永平同葉澍堃，八方同官場朋友傾過，前者最好送個字畀佢，就係一個「走」字，點解唔使多講；後者既然有志搵真銀，大家都唔好阻佢發達，希望佢過完冷河早日下海，到時要乜有乜啦。肥平近日潛晒水，唔知幾時先蒲頭，有個社團領袖同八方講，同肥平交手幾年，佢離任禮貌上都要搞個畀面派對食餐飯歡送，不過對方冇乜反應，可能任內食到夠晒皮，體形暴脹，八方就建議大家送啲減肥產品畀肥平，騎馬機呀減肥腰帶呀，乜都好啦，最緊要收靚個身，邊有名醫咁大件㗎。