林奕匡同陳柏宇今日喺又一城出席惜食堂活動，佢哋仲即席示範用廚餘做手撕雞。

講起惜食，林奕匡同陳柏宇話自己唔會浪費食物，平時都會習慣叫少飯，林奕匡話：「要習慣唔好叫太多，尤其係成班人食飯，個個都會叫好多嘢食，結果張單又大又食唔晒。」陳柏宇提議大家唔好成日食放題：「去放題都要自己節制，就算平時生活，都係叫自己足夠嘅份量就好啦。」

問到太太o依家陀住BB，陳柏宇會唔會多咗返屋企下廚？佢笑謂：「會買外賣返屋企食，煮就真係好少。最緊要係佢想食先啦，如果淨係掛住有營養，佢都冇乜胃口，不過最近嘔少咗㗎啦。」問到佢哋兩位男士又識唔識下廚呢？林奕匡就話自己最叻煎蛋，仲有獨門秘訣，而陳柏宇話自己最叻煮即食麵：「我4歲已經一次食兩個即食麵，阿媽仲帶我睇醫生，驚我生蟲所以咁大食。」

精選娛聞，喺晒《娛果》
http://fb.com/appledailyent