同一天空下真係任何事都會發生，冠軍馬房蔡約翰贏到停唔到，但最考起馬迷係谷草從來非其主場，今季他卻贏到你唔信。

當大家認為雷神停賽，蔡廐攻勢可能會緩一緩，但原來又唔錯晒。在雷神早前停賽的兩個賽日裏，蔡廐3月11日贏三場，上周三（14日）夜賽若非蔡明紹「勁豐裕」慢閘後上不及影相僅輸，蔡廐又可中三元，最終仍取得兩W兩Q成績。

事後孔明，蔡廐攻勢展開時毋須理會配搭，原因係可憑馬勇態搭夠，蔡氏力場真犀利。

後晚（21日）蔡廐出馬精簡，但並不代表削弱贏馬機會，全晚只出「話得事」、「龍船」，兩駒均屬季內未交代馬。

上述兩駒共通點係幾乎隔一個星期就上陣，第五場「話得事」季初73分於谷草1200米輸給現已85分的「財高八斗」入Q，同程實力已獲認證，現71分而今次面對一組不強對手，是出頭黃金機會。

第七場「龍船」季內12戰輸晒，減至目前76分，季初85分二班同程仍與「小米周」串Q，此時此刻爭三班點秤都極惡。