孫柏文現身在倫敦，睇到英國政局之亂、民怨沸騰嘅程度同香港不相伯仲。你可能問，一樣咁嬲的話，催淚彈呢？

我以前都講過好多次，英國佬衍生出國會呢個物體，係因佢哋係最暴力嘅民族（始終係入侵他國嘅健力士記錄保持者）。因為要令民怨、衝突得以揮發，唔變成暴力，所以就要搵個場所去咁做。

不過呢刻，佢哋國會完全代表唔到民意，甚至下下逆民意。而英國差佬仲未使放催淚彈嘅原因，係首先佢哋之前嚴重錯判形勢嘅女領導，自動下台。第二，就係國民覺得好快有機會大選，趕晒啲逆民意嘅立法機關代表走。

最弊，就係廿一世紀最廢英揆Cameron，為穩自己當時嘅聯合政府，2011年通過咗「定期國會法」，將以前隨時可解散國會去大選（例如當國會已不能反映民意時），變成除非有三分二議員支持大選，否則一做做五年。令一個逆民意嘅國會，啲驚輸議員更加賴死唔走，癱瘓政府。

即好好似依家咁，一個冇大多數議員支持嘅政府，面對一個分裂至不能組成政府嘅大多數反對議員，唯一齊心做嘅就係反政府的一切。不過又反大選去重新執位。點搞？

當然，呢個田地，係因英國同香港一樣，社會都係問緊自己「邊個話事先？」新英揆就話英國人當家作主，反對派則要推翻2016年公投結果，繼續留歐。

咁分裂，應該就係益咗繼續想話事，不斷吸食立法話事權嘅歐盟。所以新英揆Johnson點嗌，歐盟都話之前俾前任May嘅脫歐條約，一字不能改、一步不能退。買重英國政局亂到國民棄脫留歐。

點知，越來越「留」嘅工黨，上周出現爆破點。佢哋嘅影子外交大臣話，如工黨執政，就會重新同歐盟傾新脫歐方案。傾完就叫多次公投，跟住工黨會反自己傾返來嘅方案，全力撐留歐！一講，全國嘩然。

原本見到英國越亂越開心嘅歐盟政府，忽然醒覺，原來佢哋神級隊友，淪為最弊神豬級，所以呢幾日歐盟政府態度都急速軟化。

所以，如果你要賭英鎊升，呢刻就應該揸英鎊。直至歐盟宣佈新方案，Johnson走出來話好正之日，就平倉。萬萬不能等到國會落實。因我唔識睇國會會否支持呢個方案，冇值博率。

孫柏文

---------------------
兩次聚會 六大名家
分享長中短投資部署
立即點擊參加
蘋果動新聞 x 瑞萬通博【亂市投資攻略】
活動詳情： https://bit.ly/2lMN6tE
-----------------------------
基金資料大集合 一書幫你贏盡強積金
點擊即睇《贏盡強積金》電子書