利物浦有Liver Bird（利物鳥），愛華頓由今季開始都多咗隻雀。球會同Rovio達成贊助合約，波衫衫袖將會印上Angry Bird（憤怒鳥）嘅logo，大家仲要喺周日造訪曼聯場波就見到。

愛華頓喺官網公佈消息，Angry Bird嘅logo今季會出現喺左臂上嘅衫袖。Angry Bird有幾受歡迎，相信都唔需要多講，拖肥糖就話根據去年統計，有超過4.5億人下載咗Angry Bird手機遊戲程式，行政總裁艾斯史東發表感受時，亦話好開心可以同Rovio成為商業合作伙伴，因為知道Angry Bird好受歡迎，會令愛華頓更多人關注。