容祖兒、張敬軒、許廷鏗同吳業坤今日喺紅館出席港台活動，之前祖兒喺台灣金曲獎任頒獎嘉賓，因未能讀出得獎者名，笑言叫對方自己上台，被指不尊重，事後拍片補鑊仍被批評未夠誠意，之後急刪道歉片段，公司同事指佢唔開心而瞓唔着，佢話：「第一次去呢個大型頒獎禮，將心比己覺得應多啲準備，事前怕讀錯名，有問過（大會）可唔可以睇結果先，但唔得。揭結果嗰時已深知不妙點讀呢，呢啲都係命運安排。」佢話過咗去就算，唔會因為捱轟而耿耿於懷，下次再做好啲。

當晚頒獎禮盧凱彤得獎兼宣布婚訊，祖兒指認識對方太太余靜萍，喺工作上合作過，佢話:「小余有幫我影過唱片封套，同MV，阿妹(盧凱彤)有嚟探班，見證佢哋發展，經歷過好多，戥佢哋開心。」而軒仔以前跟盧凱彤係鄰居，常見面有一齊食飯，覺得阿妹去咗人生另一階段。至於會唔會叫老友擺酒請食飯，二人就話等對方公佈。

另外，吳業坤同麥明詩拍劇又一齊坐車玩直播，但吳業坤急澄清唔係拍拖，佢話：「已害咗好多人，我哋了解咗都唔會發展，我頭髮唔夠亂。」佢仲打開心口俾大家睇拍劇時被麥明詩打到一大撻瘀青，佢話：「嗰幕俾佢發洩，打咗幾拳，因為拍咗幾個角度，你哋幫我追討索償。」