盲人歌手梁球，一心喺樂壇大展拳腳，可惜未有機會出力，已經被拉落舞台。不過梁球未有因此而放棄，佢成功轉型，做一個「時代的顛覆者」，佢話：「嗰時開始，我經過一段好黑暗嘅時期，自己開解自己，搵出路，當年我用咗兩、三年時間企番起身，搵到條出路，我更加要做多啲另類工作，包括去做義務工作，去教會教吓結他、唱吓歌，97年嘅時候，行呢條路我好開心，我開始加入一啲殘疾團體，幫佢哋爭取平等機會同權益，呢個係一個好有意義嘅工作，係一生可以唔停嘅工作，係更加充實，有挑戰性，豐富我人生，各方面嘅能力，但係如果我冇之前出唱片嘅機會，我相信我做呢個工作冇咁容易，做唱片經歷過令人刻骨銘心嘅創傷，仲有就係我認識咗好多傳媒機構，所以冇呢個咁難以忘懷嘅遭遇，唔會刺激到我搵到呢條出路。」

但係喺97年至03年，梁球又突然離開所有團體，佢解釋：「因為我太積極做嘢，呢個係一個好大缺點，亦係令到好多團體對我既愛且恨嘅缺點，本來係優點，變咗係缺點，因為我咁樣會搞到佢哋同政府關係唔好，好緊張，直接影響到佢哋向政府申請資助，團體有呢個顧慮，所以用好多方法，直接間接叫我走，話我做啲嘢損壞個會嘅聲譽，或者係刻意將團體物件私有咗，之後我決定要走。03年之後，我冇放棄呢個工作，只係用個人名義去做，唔會影響團體，或者俾團體影響，之後更自主，力量更大，只要你做嘅嘢正確同有益，傳媒都唔會唔幫你，所以我好多謝傳媒朋友。」