銀行老總賓架S講起銀行生意難做，信用卡濫發濫用，佢話：「一啲新婚夫婦結婚搬入新居，邊度使買音響㗎，攞多幾張新信用卡，就可以搵銀行送齊全套啦。」一言驚醒夢中人，下次搬屋，大可以用呢一招，攞到張卡係咁意用幾個月，之後咪退返去囉。
左丁山呢類唔係信用卡好客，因每個月見單即付，從來唔分期還款，銀行賺唔到我嘅利息。賓架S話：「你呢類人正係豬頭骨，大約佔信用卡持有人百分之四十五。現在公布嘅信用卡壞帳率係四點七五巴仙左右，撇除你呢類從來唔借錢嘅cardholders，實際壞帳率應該係十巴仙，係歷史高位，你話風險幾大呢！」
既送高檔禮品，再免年費，又遭遇高壞帳率，真係好難賺錢喎，唔怪得賓架S頭擰擰。
發完牙痕，返到公司已經三點幾，拆開信件，竟然收到證券公司與XX銀行合作嘅一張白金卡，免三年年費。唉吔，即刻退回似乎唔畀面，惟有袋響荷包先，但係就唔多會用咯，一般禮物好難吸引我哋用卡，好似投資D咁，呢排猛用國泰航空卡，佢話方便搭飛機有upgrade喎。